La reforma del IRPF que prepara'l Principáu va beneficiar a la "mayoría social"

Peláez pide al PP que sofite la llei

El Gobiernu del Principáu trabaya na ellaboración d'una propuesta "rigurosa" pa la reforma del IRPF, dientro de la vía fiscal asturiana, na que valora'l cambéu de los tramos de rentes y los tipos de gravame pa beneficiar a la “mayoría social" de la comunidá.

Asina lo sorrayó esti llunes el voceru del Executivu rexonal y conseyeru de Facienda, Guillermo Peláez, en rueda de prensa tres la celebración del Conseyu de Gobiernu.

El titular de Facienda esplicó que la so conseyería ta trabayando nos detalles técnicos d'esta propuesta, que se va centrar "en beneficiar a les clases media y trabayadora, que ye la mayoría social", y que se va aprobar anguaño pa que s’aplique na campaña de la renta del próximu añu.

"La tarifa del impuestu afita la xusticia tributaria, polo que necesita de trabayu rigurosu y técnicu ufiertar una nueva", sorrayó tres afitar qu'entá ye bien llueu pa ufiertar detalles de la mesma.

Guillermo Peláez pide al PP que rectifique y la sofite. El diputáu del PP Luis Venta diz que nun hai nada que sofitar.